AQQUT pillugu

Kalaallit Nunaanni aqqutissiuussinermi suliniutinik ineriartortitsinermik nalilersuinissaq ineriartortitsinermullu sinaakkutissanik pilersitsinissaq AQQUT-ip – Nunatsinni Aqqutissiuussisoqarfiup – siunertarai. Ilinniagaqarfiit assigiinngitsut iluini aqqutissiuussinerup pitsaassuseqartinneqarnerata nukittorsarneqarnissaa aqqutissiuussillutillu sulinermik ingerlataqartut tamarmik tapersersorneqarnissaat Aqqutissiuussisarfiup suliniutigai.

Suliassaqarfimmik tassannga 1. juli 2025 aallarnerfigalugu allanngortitsisoqarpoq, tassa Qinngorneq INULERIVIMMUT nuunneqarmat. Taamaalilluni Qinngorneq AQQUT-ip ataaniikkunnaarpoq, aaqqissuussaanermili Isumaginninnermik Aqutsisoqarfiup ataaniilerluni.

AQQUT – Nunatsinni Aqqutissiuussisoqarfik

(Ilinniartitaanermut Naalakkersuisoqarfiup ataani immikkoortortaqarfik)

• Aqqutissiuussinermi suliniutinik ineriartortitsineq nalilersuinerlu
• Aqqutissiuussinermik suliassaqarfimmi periaatsinik ineriartortitsineq pitsaassuseqartitsinermillu qulakkeerinninneq
• Aqqutissiuussisoqarfinnik tapersersuineq taakkualu pisinnaasaqassusiinik piorsaaneq
• Aqqutissiuussisunik Tunngaviusumik Ilinniartitsineq (VGU – Vejledergrunduddannelsen), aqqutissiuussisunik nutaanik pikkorissaasarnerit, VGU-mut uiggiullugu ilinniaqqitsitsineq.
• Qarasaasiat aqqutigalugit aqqutissiuussineq (eVejledning)

Qinngorneq

(Massakkut Inulerivimmi, Isumaginninnermik Aqutsisoqarfiup ataani)

• Atuartunik ilinniagaqartunillu isumaginninnermut tarnillu piussusiinut tunngasunik sammisaqartitsineq
• Ataasiakkaanik oqaloqateqartarnernik ingerlatsinerit pinaveersaartitsiniarlunilu tapersersuineq
• Ilinniagaqarfinnik Qinngornerup suliai pillugit ingerlaavartumik oqaloqatiginnittarnerit ilisimasanillu avitseqatigiittarneq/siammarterineq.